АЗ ЖАРГАЛЫГ ТҮГЭЭЕ

Beauty Secrets нь дэлхийн шилдэг арьс, үс, бие арчилгааны бүтээгдэхүүнүүдийг албан ёсны эрхтэйгээр Монголын хэрэглэгчид хүргэх, тэднийг гадаад гоо сайхнаа хадгалж үлдэхэд туслах зорилгоор байгуулагдсан Монголын анхны гоо сайхны цахим дэлгүүр, анхны Beauty Tech компани юм. Мөн олон улсын зах зээлд суурьшсан гоо сайхны Subscription үйлчилгээг Монголд нэвтрүүлсэн анхдагч. Бид хэрэглэгчдээ өөрийн төрөлх гоо сайхнаа хайрлахыг уриалдаг бөгөөд цаашид улам олон хүнд өөрийгөө хайрлах, бусдыг хүндлэх эерэг энергийг түгээхийн төлөө зорьж ажиллах болно.


КОМПАНИЙН ҮҮСЭЛ

Компанийн үүсгэн байгуулагч, найз нөхөдтэйгөө арьс арчилгааны тухай мэдлэг, мэдээлэл хуваалцаж, тулгарч буй асуудлынхаа талаар санал солилцох зорилгоор Facebook групп нээснээр BeautySecrets компанийн суурь тавигдсан.

Гоо сайхан нь өөрөө эмэгтэйчүүдийн хувьд хамгийн их сонирхол татсан сэдэв байдаг тул цаг хугацааны явцад сошиал групп өргөжин тэлж олон гишүүнтэй болсон. Энэ хугацаанд тэдэнд тулгарч буй хамгийн том асуудлын нэг нь тохирсон бүтээгдэхүүнээ олж чадахгүй, буруу сонголт хийж цаг хугацаа, мөнгө, арьсны эрүүл мэндээрээ хохирох явдал байв. Үүнд туслах зорилгоор 2016.11.12-нд Монголын анхны гоо сайхны SUBSCRIPTION үйлчилгээг нээж, хэрэглэгчдэд хүргэсэн. Хэрэглэгчдэд туршиж үзэх болон бүтэн савлагаатай 5 бүтээгдэхүүнийг сар бүр, багцын үнээр, гарт нь хүргэж өгөх нь бүсгүйчүүдийн хувьд дээрх асуудлыг шийдсэн хамгийн зөв шийдэл байсан бөгөөд өнөөдрийг хүртэл манай хамгийн эрэлттэй, өндөр үнэлгээтэй үйлчилгээ байсаар байна. 

Beauty Secrets брэндийн түүх

Beauty Secrets нь арьс арчилгаа, гоо сайхны бүтээгдэхүүн худалгааны салбарт дөрөв дэх жилээ үйл ажиллагаа явуулж байгаа ба цар тахлын он жилүүдэд 180 мянган бүртгэлтэй хэрэглэгч, 1,000 урьдчилсан захиалагчтай /subscribers/ болж чадсан Монголын хамгийн хурдтай өсөн тэлж буй цахим худалдааны бизнесүүдийн нэг юм. Компанийг үүсгэн байгуулагч Д.Энххорвоо бизнесээ эхлүүлэхийн өмнөх нэг жилийн хугацаанд 20,000 гишүүнтэй Beauty Secrets Facebook групп нээж, түүгээрээ эмэгтэйчүүд гоо сайхны бүтээгдэхүүн сонгохдоо хэд хэдэн асуудал бэрхшээлтэй тулдаг болохыг тандаж мэджээ. Ингэхэд, хоёр зүйл маш тодорхой болсон нь Монгол бүсгүйчүүд гоо сайхан, арьс арчилгааны бүтээгдэхүүний гарал үүсэл, үр нөлөөнд үргэлж эргэлздэг, хоёрдугаарт, таарч тохирох эсэх нь тодорхойгүй бүтээгдэхүүнд их хэмжээний мөнгө зарлагаддаг нь ажиглагдсан байна. Энэ хоёр асуудлыг шийдвэрлэхээр онлайн дэлгүүр болон Монголын анхны урьдчилсан захиалгат үйлчилгээ болох Beauty Box-ыг танилцуулсан нь өнөөгийн амжилтын эхлэл болжээ.

Эхний асуудлыг шийдвэрлэхээр Beauty Secrets Солонгос улсын k-beauty салбарыг төлөөлөх нэр бүхий томоохон брэндүүд рүү хэдэн зуун цахим шуудан илгээж эхлэхэд Mizon брэнд эхний хариуг өгч 10,000 долларын захиалга хийх шаардлага тавьсан. Анх 300 мянган төгрөгөөс эхэлсэн бизнесийн хувьд 10,000 доллар асар хол санагдсан ч шийдвэрээ нэгэнт хийсэн болохоор алхам тутамдаа эрсдэл гаргаж, он улирах тусам илүү том эрсдэлтэй бүтээгдэхүүн татан авалтыг хийх болсон байна. Эрэлт маш их байсан болохоор нийлүүлэлтээ гүйцээхийн тулд эхний гурван жилд эргэлтийн хөрөнгө маш их дутагдалтай байлаа. Тэрээр бизнесээ санхүүгийн эх үүсвэрийн байнгын дутагдлаас ангируулах ёстой гэж үзэн дотнын найз нөхөд, гэр бүл, танил талаасаа мөнгө зээлж доллар, цент бүрийг мөнөөх бүсгүйчүүдийн гоо сайхны асуудлыг шийдэхэд зарцуулж чадсан. Ийнхүү хүсэл тэмүүлэлдээ шатах үедээ Rolex-ийн цагаа ч зарсан түүх түүнд бий. Азид төдийгүй дэлхийд нэр цохидог K-beauty брэндүүд Монголын зах зээлийг голж байсан ч тэдний итгэлийг олсоноор Klairs, Aromatica зэрэг Азийн хамгийн өндөр борлуулалттай брэндүүд ар араасаа Beauty Secrets-ийг албан ёсны борлуулагчаар хүлээн зөвшөөрч эхэлсэн. Өдгөө Солонгосын нэр хүндтэй 20 брэндийн 1,000 төрлийн 8,000 бүтээгдэхүүн BeautySecrets.mn цахим худалдааны бүрэн автомжуулалттай цогц системээр дамжин борлуулагдаж байгаа нь тухайн брэндүүдийн хувьд Монгол Улсыг гол түнш болгож, зах зээлийн томоохон байр сууринд аваачсан юм. 

Монгол бүсгүйчүүд арьс арчилгааны бүтээгдэхүүн сонгохдоо арьсны онцлогтоо нийцүүлэх, орц найрлагыг нь судалж авахад төдийлөн анхаардаггүй, сургаар, хайрцаг савны үзэмжээр сонголт хийдэг байсан. Beauty Secrets-ийн үүнд олсон шийдэл нь сар тутамд гоо сайхан, арьс арчилгааны таван бүтээгдэхүүнийг Beauty box нэрээр савлаж, тогтмол цаг хугацаанд хүргэх болсноор худалдан авагчид бүтээгдэхүүнийг хямд зардлаар турших боломжтой болсон юм. Монголын анхны урьдчилсан захиалгат хүргэлтийн үйлчилгээгээр бүтээгдэхүүн бүрийн орц найрлага, үзүүлэх үр дүн тэргүүтэй мэдээллийг алдалгүй хүргэж, хэрэглэгчдэд зориулсан бүтээгдэхүүний талаар сэтгэгдэл бичих хэсэг сайтдаа нэмж арьс арчилгааны мэдлэг ойлголтыг түгээж байлаа. Хэдий k-beauty Монголд зохих хүрээллээ бий болгож, үнэ цэнээ нутагшуулж чадсан ч цахим дэлгүүрээр үйлчлүүлэх нь дийлэнх худалдан авагчдад цоо шинэ зүйл байсан тул цахимаар бүтээгдэхүүн сонгох, төлбөр тооцооны цахим систем ашиглах зэрэгт худалдан авагчдаа сургахын тулд 24/7 үйлчилгээ үзүүлдэг байсан.


ӨНГӨНИЙ БЭЛГЭДЭЛ

Бид ягаан өнгийг брэндийнхээ илэрхийлэл болгон сонгон авсан нь учиртай. Эл өнгө эмэгтэй хүний гоо үзэсгэлэнг тэтгэж, гал халуун дурлалыг бэлгэдэхээс гадна залуу нас, эрүүл саруул бие, дэггүй хөгжилтэй занг бэлгэддэг учраас бидний дотоод мөн чанарын илэрхийлэл болох болов уу хэмээн бодож сонгосон.


БРЭНДҮҮД

Бид БНСУ-ын олон улсын зах зээлд нийлүүлдэг 16 брэндийн бүтээгдэхүүнийг албан ёсны эрхтэйгээр, Монгол улсын хууль, журмын дагуу импортлон хүргэж байна. Бид зөвхөн брэндийг импортлох бус давхар тэдгээрийн баримталдаг үнэт зүйлс, зарчмуудыг хүргэхийг зорьдог.


ХАРИУЦЛАГА

Олон улсад танигдсан, тэргүүлэх брэндүүдийн Монгол дахь албан ёсны борлуулагчийн хувьд бид тус брэндүүдийн баримталдаг үнэт зүйлс, зарчмуудыг ч мөн адил Монголын гоо сайхны бүтээгдэхүүний зах зээлд байршуулж, хэрэглэгчдээ зөв, аюулгүй сонголт хийхийг уриалдаг. Төрөлхийн гоо сайхны хайрлаж, бусдад ч мөн адил шүүмжлэлгүй хандах, байгальд ээлтэй сав баглаа боодолтой, хорт бодис агуулаагүй, амьтан дээр туршигдаагүй, байгалийн орц найрлагатай бүтээгдэхүүнийг сонгох, арьс арчилгааны мэргэжилтнүүдтэй хамтарч зөв мэдээллийг түгээх зэрэг олон зорилтуудыг тавин ажиллаж байна.

Зөвхөн хэрэглэгчдээсээ гадна бид нийгмийн хариуцлагын хүрээнд дараах ажлуудыг хийж байна. Үүнд:

  • Жижиг дунд бизнес эрхлэгч эмэгтэйчүүдийг дэмжиж хамтын WE оффисоор хангах, тэдний үйлдвэрлэсэн бүтээгдэхүүнийг хэрэглэгчдэд хүргэхэд туслахаар giftbox.mn вебсайтыг нээв.
  • Онцгой нөхцөл байдлын үед шаардлагатай тусламжийг бүтээгдэхүүн болон мөнгөн дүнгээр тогтмол хүргэдэг.
  • Гоо сайхны бүтээгдэхүүний сав, хайрцгийг дахин боловсруулахад уриалах үүднээс салбар дэлгүүрүүддээ НОГООН ХАЙРЦАГ-уудыг байршуулав.
  • Цаасан хог хаягдлыг бууруулахыг уриалж НӨАТ баримтыг цахимаар авах, дахин боловсруулсан материалаар хийгдсэн хайрцаг, савалгаатай бүтээгдэхүүний мэдээллийг хүмүүст түгээхийг зорьдог.
  • Арьс арчилгааны эерэг, зөв мэдээллийг хүргэдэг контент бүтээгчидтэй хамтарч, дэмжин ажилладаг.
  • Олны танил, бусдыг дагуулагч хүмүүсээс сонирхолтой, хэрэгтэй мэдээлэл хүргэх зорилгоор ГЭРТЭЭ цуврал контентуудыг хүргэж байна.

Beauty Secrets-ийн амжилтын нууц нь юу вэ?

Үйлчлүүлэгчдээ сонсож мэдэрдэг - Beauty Secrets-ийн давуу тал бол худалдан авагчдаа сонсож, сэтгэл ханамж, санал сэтгэгдлийг нь хүлээн авч, үйлчилгээндээ цаг алдалгүй нэвтрүүлдэг дадал хэвшил юм. Бүтээгдэхүүний сонголтдоо хүртэл хэрэглэгчдийнхээ хүсэл сонирхлыг шингээж, хэрэглэхийг хүссэн, өндөр эрэлттэй брэндүүдийг оруулж ирдэг. Сэтгэл ханамжид бүрэн нийцэх, сайхан сэтгэгдэл төрүүлэхүйц үйлчилгээ, өнгө үзэмж, хялбар бөгөөд эмэгтэйчүүдийг ойлгодог, хэрэгтэй бүтээгдэхүүнийг нь олж санал болгодог хайлтын систем, найрсаг харилцаатай хүргэлтийн ажилтан төдий чинээ чухал. Үүнийг мэдэрч, үнэнч хэрэглэгчид цуглуулж Монголын хамгийн цогц мэдээлэлтэй онлайн дэлгүүр бүтээж чадсан нь Beauty Secrets-ийн нууц.

Технологийн дэвшилтэт байдал – КОВИД-19 цар тахалтай холбоотой хөл хорио тогтооход Beauty Secrets өдөрт 1,000 захиалга хүлээн авч эхэлснээр 10х хурдаар бизнес нь тэлсэн. Энэ олон захиалгыг гар аргаар бүртгэж, зохицуулах боломжгүйг тэр даруй мэдэрч Beauty Secrets ганцхан сарын дотор бүх үйлчилгээгээ автоматжуулж, 100 хувь технологи суурьтай компани болсон юм. Ийнхүү технологийн сүүлийн үеийн чиг хандлагыг мэдэрч, цаг алдалгүй нэвтрүүлэн платформоо үргэлж сайжруулж байгаа нь түүний бас нэгэн нууц. 

Мэдрэмж – Цахим худалдаа нь бүтээгдэхүүний сонголт, татан авалт, түүнийг бүртгэх, мэдээлэл оруулах, захиалга, төлбөр тооцоо, хүргэлт, санал сэтгэгдэл хүлээн авч тогтмол сайжруулах гэсэн цогц системд суурилан ажилладаг. Энэ бүх шат дамжлага, үйл ажиллагаа ямар нэг гэмтэл сааталгүй, урсгалаараа явж байгаа нууц нь эмэгтэй удирдагчийн менежментийн арга барил буюу тогтолцоонд саад болж буй өчүүхэн ч хамаагүй асуудал нэг бүрийг олж тогтоож, шийдвэрлэх дадал юм. Зөвхөн ашиг орлого, бизнесийн өсөлтөд анхаарч тогтолцоог бүрдүүлэгч жижиг үйл явцуудыг орхигдуулснаар цахим худалдааны дийлэнх нь удалгүй бүтэлгүйтдэг.

BEAUTYSECRETS-ийнхэн...

Бид BeautySecrets сошиал хаягаараа дамжуулан Instagram, Facebook-ийн 50,000+ дагагчиддаа шинэ бүтээгдэхүүн, урамшууллын, арьс арчилгааны мэдээлэл хүргэдэг. Тэр дундаа, бүтээгдэхүүний орц найрлага, зөв зохистой хэрэглээ, сонголтын талаар мэдлэг хүргэх контентуудыг хүргэхийг нэн тэргүүнд зорьж ажилладаг. Цаашид видео контентуудыг хөгжүүлж, гоо сайхны мэдлэг мэдээлэл олгохоор ажиллаж байна.

БИДЭНТЭЙ НЭГДЭЖ АЗ ЖАРГАЛ, ГОО САЙХАН, ХАЙРЫГ ХАМТДАА ТҮГЭЭГЭЭРЭЙ.

X